زى ما بيقول المثل القديم( المصرى ها يفضل مصرى )..لكن يا ترى مين هو المصرى و ازاى تعرف ان البنى ادم اللى قدامك مصرى من غير ما تشوف بطاقتة ولا جواز سفرة الاخضر ؟!..
الحكاية دى شغلت ناس كتير قوى يمكن لان المصرى واحد اهم البنى ادمين فى الدنيا اللى دائما محتفظ لنفسة بصفات و خصائص معيتة تلاقيها مشتركة و منتشرة وسط كل المصرين و صعب قوى تلاقيها فى اى بنى ادم من جنسية تانية.. واحد من اصحابنا على الانترنت ما كتبش اسمة و حاول يجمع شوية صفات من صفات الانسان المصرى و اللى هتلاقية لوحدة بس دونا عن كل البشر عندة الصفات دى.. تحبوا تسمعوا معانا وتقولوا رايكم هو صح و لا لا ..
بيوقللك ياسيدى ان المصرى هو الى بيفهم فى الطب ويشخص المرض ويوصف لك الدواء وبيفهم فى النقاشة والكهرباء وتصليح العربيات والطبخ والسياسة والكورة وهو ..ابيض ياورد..
هو نفسه برضه الى بيحط الريموت كنترول فى كيس بلاستيك كعادة فرعونية قديمة يمكن !
وهو الوحيد اللى بيقف يتكلم على الباب نصف ساعة بعد انتهاء الزيارة والسلام ويحكى عن كل المواضيع اللى كان لازم يقولها جوة البيت !..
المصرى نفسه دائما يهول الامور ويقولك مثلا (انا جيت لك اكتر من 100مرة امبارح!وهوا اللى يتكلم عن الحرية والديمقراطية ويزعل اوى لو ابنه حب يدخل كلية مش على مزاجه!)
المصرى كمان له امثال ظريفة جدا (خليها تسبح هوا انا اللى هااغير الكون !خدوهم بالصوت ليغلبوكم:ودائما مغلوب على امره !
وكذلك عندما تفتح دواليب المطبخ هتلاقى عنده عشرين برطمان مربة فاضى بقالهم سنين ومازال مصر على جمع المزيد منها
هوا نفسه اللى بيروح ميعاده بعد ساعتين وبيفتكر ان ده شئ عادى ..ويخلص شغله فى اخر عشر دقائق ويذاكر للامتحان قبله بيوم ولسه عنده اصرار ان يتكلم بصوت عالى فى التليفون لما تكون المكالمة دولية عشان التانى يسمعه
المصرى نفسه بيعتبر انه افضل واحد فى الشراء والفصال وبعد كده يكتشف ان الحاجة نفسها فى المحل اللى جمبه ارخص من غير فصال !برضه هتلاقى بيحتفظ باكياس محلات اللبس والاحذية وورق الهدايا تحت المرتبة والكارثة انه نادرا جدا لما يستخدمها
وممكن يعدى الثلاثين من عمره ولسه عايش مع امه وابوه وما عندهوش مشكلة :تلاقيه برده بيشترى قبل الفطار فى رمضان مواد استهلاكية موجودة اصلا عنده فى البيت لسه ما استخدمهاش وهو نفسه اللى بيشيل طابع البريد من على الظرف لو الختم ماكنش عليه
اخونا وحبيبنا المصرى تلاقى عنده شواية لزوم الرحلات اقصى استخدام لها كان مرة واحدة فى العيد من خمس سنين
وهوا نفسه اللى فاكر ان اى حد بيشتغل فى الخليج بيغرف فلوس من غير حساب ؛ويكون مشغول بقيمه البقشيش (التبس)طول العشاء ياترى جنيه ولا نصف جنيه ومع ذلك بيتخانق ساعة دفع الحساب بحرارة شوية ويصر لازم يدفع
المصرى كمان تلاقيه بيفرش ملاية السرير على طقم الانتريه عشان يفضل نظيف قدام الضيوف وما بيشلهاش لما الضيوف يحضروا
والاهم من ده كله انه هوا الوحيد وسط بقية البشر اللى ممكن يقول على بلده اى حاجة فى الدنيا انما استحالة انه يسمع عنها كلمة وحشة من اى حد ولو حصل ده بيفرش له الملاية
حد شاف فرش الملاية من قبل كده ياترى...صاحبنا عنده حق فى اللى قاله عن المصرى ..كل واحد ورايه!
[ندعوك للتسجيل في المنتدى أو التعريف بنفسك لمعاينة هذا الرابط].